چەند پێشنیازێک بەر لە نەشتەرگەری

ڕەنگە گرینگترین تێبینی بەر لە نەشتەرگەری هەڵبژاردنی پزیشکی نەشتەرگەر بێت بۆ ئەوەی کە بتوانن متمانەی پێ بکەن. ئەگەرچی نەشتەرگەری لووت زیاتر لە لایەن پسپۆڕانی گوچک و قوڕگ و لووتەوە ئەنجام دەدرێت بەڵام پسپۆڕانی نەشتەرگەری چناکە و دەم و چاویش و هەروەها نەشتەرگەرانی پلاستیک و تەنانەت نەشتەرگەری گشتیش کاری نەشتەرگەری ڕینۆپلاستی ئەنجام دەدەن. بە ڕای من شارەزایی، زانست و ئەزموون لە نەشتەرگەری لووت و وردبینی و هەستی هونەری و جوانی ناسی زاتی پزیشکی نەشتەرگەر لە بە دەست هێنانی ئەنجامی جوان لە نەشتەرگەری لووت لە جۆری پسپۆڕی ناوبراو گرنگترە. هەڵبەتە لە چارەسەر کردنی کێشەکانی هەناسە دان و ڕاستکردنەوەی لووتی چەپ و چیڕ و یان خود کێشەی سینوسی پسپۆڕبوون لە بواری گوچکە و قوڕگ و لووت زۆر یارمەتیدەر دەبێت.

پزیشک بە گشتی داوای هەندێک وێنەی فۆتۆگرافی لە دەم و چاو و چەندین تاقیکردنەوە دەکات و زۆر بە دەگمەن وێنەی سی تی ئێسکەن و رادیۆلۆژیشی دەوێت. وا باشترە کە دوو حەفتە پێش نەشتەرگەریەکە ئاسپیرین و دەوای لەم شێوەیە بە کار نەبرێن. وا باشترە کە لە لانیکەم ٨ کاژێر بەر لە نەشتەرگەری نەخۆش هیچ نەخوات. ئەگەر نەخۆشی تایبەتیشی هەبێت پزیشکی نەشتەرگەر داوی ڕاوێژکاری پێویست لە گەڵ شارەزا و پسپۆڕانی ئەو نەخۆشیە دەکات. ئەگەر نەخۆشەکە توشبووی نەخۆشی ئالێرژی لووت و سینۆزیت بێت دەوای پێویست بۆ کۆنتڕۆڵ کردنی بەر لە نەشتەرگەری بە نەخۆشەکە دەدرێت. پزیشکەکەتان سەبارەت بە هەر جۆرە دەوا و دەرمانێک کە دەیخۆن ئاگادار بکەنەوە و ئەگەریش توشبووی شتێکن بەر لە نەشتەرگەری باسی بکەن.

شەوی پێش نەشتەرگەری وا باشە خۆتان بشۆن و بۆ پیاوانیش ئەگەر موەکانی ناو لووتتان درێژە هەوڵ بدەن کورتیان بکەنەوە و سەر و ڕیشیشتان تەواو بتاشن.

لە بیرتان نەچێتەوە ئەگەر هێشتا ١٨ ساڵتان تێنەپەڕاندوە پێویستە فۆڕمی ڕەزامەندی لە نەخۆشخانە لە لایەن باوکتانەوە پڕ بکرێتەوە و کچانیش ڕەزامەندی باوک و ژنێکیش کە زەواجی کردبێت پێویستی بە ڕەزامەندی هاوسەرەکەی هەیە. ئەگەر چی هەر وەک چۆن پێشتریش ئاماژەمان پێدا لە بواری پزیشکیەوە تەنانەت لە تەمەنی ١٤ و ١٥ ساڵانیشدا ئەگەر گەشەیەکی تەواو هەبێت دەتوانرێت لووت نەشتەرگەری بۆ بکرێت . خۆ لە بە کارهێنانی ئاسپیرین و دەوای هاوشیوە لە ٢ حەفتە پێشترەوە بپارێزن و بە کارهێنانی ئیستامینیفۆن  و ئیستامینیفۆن کۆدۆئین ڕێگە پێدراوە.

وا باشترە لە مانگێک پێش نەشتەرگەریەکەوە جگەرە نەکێشن ئەگەرچی جگەرەکێشان ناتوانێت ڕێگر بێت لە بەر دەم بێهۆش کردن و سڕ کردنی لووت. هەر وەک پێشتریش کە وتمان پزیشکەکەتان لە بوونی هەر جۆرە نەخۆشیەکی کە هەتانە و بووتانە ئاگادار بکەنەوە و ئەگەر پێش نەشتەرگەریەکە باپەڕ بوون و سەرماتان خواردوە بە پزیشکەکەتانی ڕابگەیێنن.

ڕۆژی نەشتەرگەری جل و بەرگێکی پر بایەخ لەبەر مەکەن وێرای ئەوەی کە جلێک بێت تێیدا ڕاحەت بن. بۆ نموونە جلی بێ قۆپچە لەبەر مەکەن.

لە بیرتان نەچێتەوە کە ٢٤ کاژێر دوای نەشتەرگەریەکە ئەندامێکی خێزانەکەتان و یان خود هاوڕێکانتان دەبێ ئاگایان لێتان بێ.